منتدي بحر الكلمات للشعر والأدب & كان نفسنا & بقلم الشاعر// وحيد محروس

( كان نفسنا )
كان نفسنا
في قلوب بريئة تضمنا
كان نفسنا
في ناس تقدر حبنا 
كان نفسنا
في أيادي تمسح دمعنا
كان نفسنا
نعيش الحياة
والأمل ياخدنا معاه
ونمشي طريقنا لمنتهاه
والحلم يصون عهدنا
كان نفسنا
كان نفسنا
في حياة وردية
ولا ندوق في يوم
طعم آسية
ولا قلوبنا تعيش
مكسورة مطوية
ولا نبقى في يوم
لقمة طرية
في ايدين ناس
أخلاقها ردية
وبايديها تخنق حلمنا
كان نفسنا
كان نفسنا
نفرح بشبابنا
ولا نشتكي يوم
ونقول احناتعبنا
ونعيش صحبة
مابين أحبابنا
نفرح وبالفرح
نقول لعذابنا
بلاش تضيع عمرنا
كان نفسنا
كان نفسنا
نعيش في أمان
وحياتنا تنور بالإيمان
ونشوف الطيبة زي زمان
ولا فقير يبات ليلة جعان
ولامن قسوتنا يعيش تعبان
وبدموعه يشكينا لربنا
كان نفسنا
كان نفسنا
نعيش بأصول
وما نتخدع يوم
بكلام معسول
ولا نجري ورا
سراب مجهول
ولا ندي فرصة
لأي عزول
يستغل طيبتنا وحبنا
كان نفسنا

بقلمي/ الشاعر وحيد محروس